 |
"Kandi naareeba ondiijo maraika naagyendera ahaiguru ahagati omu mwanya, aine engiri ey'ebiro n'ebiro okubuurira abatuura omu nsi, amahanga goona n'enganda zoona n'endimi n'abantu; yaagamba n'eiraka rihango ati:
Mutiine Ruhanga, mumuhe ekitiinisa, ahakuba obunaku bwe bw'okucweramu orubanja buhikire; muramye Ogwo owaahangire eiguru n'ensi n'enyanja n'enshuro z'amaizi" (Kush. 14:6,7).
Engiri ey'ebiro n'ebiro hamwe n'egyo ey'obukama, nk'oku yaagambirweho omuri Matayo 24:14, nizirangirirwa abantu boona omu biro by'emperu y'ensi.
N'eky'omigisha kushanga iwe oriyo nooshoma obutumwa nk'obu omu shaaha nk'egi.
Noobaasa kuba ori omwe aha bu Yesu arikubaasa kureeta omu bukama bwe aha shaaha y'aha muheru, obuheereza bwe bw'okucungura omuntu butakahendeire.
Tiina Ruhanga, Omuhe Ekitiinisa:
Okutiina MUKAMA nibwo butandikiro bw'obwengye (Enfumu 9:10). Okugira okushuuruurirwa kwa Ruhanga hamwe n'ebiragiro bye, n'orutambwe rw'okubanza omu kuzoora akahanda akarikutwara omu bukama bwa Ruhanga. Waaba otahaire kitiinisa ebiragiro bya Ruhanga, torikugira bwengye obwo kandi n'akahanda k'amagara nooba otakarimu.
Tushemereire kuguma nitutwarira ebiragiro bya Ruhanga omu kuhikiirira kwabyo, kandi tukeemanya ngu obuhangwa bwaitu bw'obusiisi nibwanga ebiragiro bye ebihikiriire, ebirikuchwera orubanja obuhangwa obwo.
Okumanya eki, nigwo muhanda oguhikire ogw'okwetegyererezamu gye okucungura kwa Yesu kandi n'okwehayo omu kuhikiirira kwe.
N'ahabw'ekyo okutiina Ruhanga, nikimanyisa okurinda ebiragiro bye kandi tukaikiriza n'okuhikiirira kwe.
Tihashemereire kubaho obutegyeki nari omwanya gw'okukoreramu, ogushemereire kutegyeka amagara gaitu kukira ekiteekateeko ky'okutiina Ruhanga.
Tushemereire kutwara ebiragiro bye nk'ebihikiriire kandi ebirikwera, kandi tukashaba MUKAMA waitu Yesu kutuha okusingura ekibi, obwo turikukimanya ngu ekibi nibwo bugomi (1Yohaana 3:4).
Ogu nigwo muringo oguhikire ogu tushemereire kutiinamu Ruhanga.
Paulo naashoboorora ngu amagara agarimu okuhikiirira garimu okurya n'okunywa, nangwa n'ebindi ebi turikukora, omu muringo ogurikureetaho amagara marungi.
"N'ahabw'ekyo ku muraabe nimurya nari nimunywa nari nimukora ekintu kyona, mukore byona okuhimbisisa Ruhanga. (1Abakorinso 10:31).
Kwonka engiri ey'omu biro by'aha mperu neeyetengyesa ngu tube turi aha rurengo rw'obutashiisha emibiri yaitu kurabira omu biturikurya nari kunywa n'obu byakuba ebigaaniiro ebitashemeire nangwa n'okwetega omu maisho gaitu ebitahikiriire (Zaburi 101:3).
Neetwehanangiriza kwetantara buri kintu kyona ekitarikuhaisa Ruhanga ekitiinisa omu magara gaitu ag'obutoosha.
Tushemereire kwerindira kimwe ebirikukyamura omubiri: amaarwa, ebitokoozabwonko, enyama y'empunu kandi na buri kintu kyona ekirikubikorwamu.
Okukira byona tushemereire kurya ebihingirwe omu itaka, kandi omu biro mukaaga tukakora ebyo byonka ebirikuhimbisisa Ruhanga waitu.
Oku nikwo Ebyahandiikirwe birikugamba ahari abo abarikwikiriza obutumwa obu, "Aho niho okugumisiriza kw'abarikwera kumanyirwa, aboorobera ebiragiro bya Ruhanga, bakaikiriza Yesu"(Okushuuruurirwa 14:12).
Ebiragiro bya Ruhanga nikyo kipimo eki Ruhanga arikupimiraho emitwarize yaitu.
Ikiririza kugyendera omu biragiro bya Ruhanga, ahakuba "ah'okwikiriza kutari tikirikubaasika kumushemeza" (Abaheburaayo 11:6).
Okwikiriza okuhikire nikutwebembera omu magara agahikiriire, kutureetera kwikiririza omu byaragwirweho Ruhanga kandi kutwikiririsa buri kacweka koona akari omu Kigambo kya Ruhanga, nangwa n'obu ebirikureebwa byakuba nibimanyisa ebindi.
Okwo nikwo kwikiriza okuhikire. Nikitaana aha kweteekateekaho nk'ojunirwe, haza obwo orikubangaanisa enkora ya Ruhanga n'amaani g'Ekigambo kye.
"Hati, okwikiriza nikwo kuhamiza kimwe ebi twiineho amatsiko (ebyarangirwe ira n'ebyaraganisiibwe) kandi nikwo kutumanyisiza kimwe ebitarikureebwa" (Abaheburayo 11:1).
Kurabira omu butumwa bwa maraika w'okubanza, abantu nibeetwa kutiina Ruhanga, bakamuha ekitiinisa kandi bakamuramya nk'Omuhangi w'eiguru n'ensi.
Omu kukora eki, bashemereire kworobera ebiragiro bye. Omunyabwengye naagira ati, "Tiina Ruhanga, oyorobere ebiragiro bye, ahakuba ekyo kyonka nikyo omuntu ashemereire kukora" (Omubuurizi 12:13).
Haaba hatariho okworobera ebiragiro bya Ruhanga, nihaba hatariho kuramya okurikubaasa kumushemeza.
"Oku nikwo kukunda Ruhanga, itwe okworobera ebiragiro bye" (1Yohaana 5:3). Ebiragiro bya Ruhanga nibyoreka rukundo kandi Ruhanga niwe rukundo. Twaba nitusherura kurinda ebiragiro, nikiba nikyoreka ngu nitukunda Ruhanga n'emicwe ye.
Titurikubaasa kuba bamwe na Ruhanga twaba tutarikubaasa kwikiriza ngu turi abasiisi, abarikusingisibwa orubanja ebiragiro bya Ruhanga. Titurikubaasa kwihwa mu kibi, twaba tutagumiire mu kuhikiirira kw'emicwe ya Ruhanga nk'oku erikworekwa omu biragiro bye. Titurikubaasa kutunga Yesu, twaba tutarikusherura kushushana nawe omu micwe. Eky'aha muheru, titurikubaasa kuhindurwa, twaba tutarikwikiririza mu maani ga Yesu agarikubaasa kutucwa aha njegyere z'ekibi, gakatubaasisa kugyendera omu kwikiriza n'omu kworoba.
Eshaaha ya Ruhanga kuchwa orubanja
Ekirango, "Obunaku bw'okucwa orubanja buhikire," nikyoreka okuhendera kw'omurimo gwa kristo ogw'okucungura omuntu. N'okwetwa kw'ahonaaho omu iraka ry'ahaiguru (Okush.14:7).
Okweta oku nikukomooka omu kuhwa kw'emyaka 2300 (ebiro by'obunabi omu ekiro kimwe kirikumanyisiza omwaka) eyaagambirwe omuri Danieli 8:14, eyaahweireyo omu mwaka 1844.
Okushemeza obutaaho oburikwera okurikugambwaho omuri Danieli 8:14 nikugamba aha shaaha y'okucwa orubanja, ekishushani ky'ekiro ky'okurihiirira ekyabandize kukuzibwa Abaisraeli (Abaleevi 23:27-32).
Nikyoreka omurimo gwa kristo ogw'okwiha ekibi omu mutima gw'omuntu, n'okutugarura omu bumwe bw'omwoyo n'ekigyendererwa kya Ruhanga.
N'ahabw'ekyo kuruga 1844 n'obwire bukuru obw'okwakiiriramu okuhikiirira kwa Ruhanga omu bwijwire okurikuheebwa omuntu.
Baingi baakimanyire ngu okugaruka kwa Yesu kuri haihi, kwonka n'emirundi engahi ei twateekateekire aha rubanja orushemereire kucwibwa, obwo atakagarukire?
Yesu naaza kuhendera okucwa emanja, kandi ahu ariizira, omuheru gw'amagara gaitu guryaba gwaherize kucwibwamu. Eryaba eri eshaaha y'ebiconco kugabwa (Matayo 20:1-6, Okush 22:12).
Engiri ey'ebiro n'ebiro eshemereire kwetegyerezibwa omu bwijwire bwayo ahakuba obu n'obunaku bw'emperu.
Ebitabo by'ebikorwa by'abantu biriyo nibishuuruurwa omu kucwa orubanja, amagara ga boona gariyo nigeetegyerezibwa Ruhanga.
Naatandika n'abo boona abaabaire bariho omu kutandika kw'ensi, omutonganizi waitu Yesu acwa emanja za buri busingye nk'okuzirikukuratana, na bwanyima ahendera n'abo abariho hati.
Buri iziina niryetwa, buri rubanja rishwijumwa. Abo bonka abaacwiremu kujwekwa ekijwaro kya kristo eky'okuhikiirira, amaziina gaabo tigariihwa mu kitabo ky'amagara (Okush 3:5).
“MUKAMA yaagarukamu Musa ati: Weena oncumwireho, niwe ndaihe omu kitabo kyangye (Okuruga 32:33).
Obu nibwo bunaku bw'omuntu we wenka ashemereire kuba naacaaka omutima gwe. Omurimo gukwatsiibwe buri omwe kuteekateeka, kureeba, n'okushaba.
Tituragiirwe Ruhanga kwetegyereza emitima ya bataahi baitu. Reka amaani tugate omu kweshwijuma kumanya ekibi ekisherekirwe omu mitima yaitu, obumuga oburi omu micwe yaitu kandi na buri murimo ogushemereire kuba gukozirwe omu maka gaitu.
Obwo tubone kutunga embabazi za Ruhanga, ezi amaani ge garikworekyera omu micwe ya Kristo omuriitwe. (Abefeeso 3:7-9).
Muramye ogwo owahangire iguru n'ensi, enyanja n'enshuro z'amaizi
Maraika w'okubanza naayehanangiriza abantu kutiina Ruhanga nk'omuhangi, ekintu ekirikuruga omu kwikiriza, kandi nk'omuringo gwonka ogurikututebeekanisa ahabw'obunaku bwe bw'okucweramu orubanja.
Okuhamisiriza enshonga y'okuhangwa kw'iguru, ensi, enyanja hamwe n'enshuro z'amaizi, nikyoreka buri kigambo ekiri omu kiragiro kya kana, ekyo ekirikugamba ahari Sabato y'ekiro kya mushanju.
Maraika w'okubanza naatwijutsya ekiragiro kya kana: "omu biro mukaaga nimwo MUKAMA yaahangiire eiguru n'ensi, enyanja n'ebirimu byona, akahuumura aha kiro kya mushanju; nikyo MUKAMA yaaheereire omugisha ekiro kya mushanju, akakyeza" (Okuruga 20:11).
Maraika w'okubanza okugamba aha buhangi hamwe n'okushushanisa obutumwa bwe n'ekiragiro kya Sabato aha shaaha ya Ruhanga ey'okucwa orubanja, n'enshonga eine kuteebwaho omutima.
Twaba nitwikiririza omu maani ga Ruhanga agarikuhanga, nituba nitubaasa n'okwikiririza omu kubaasa kwe kutuhanga busya ngu tugire emicwe nk'eye etaine kibi.
Kandi twaba nitwikiriza ngu Ruhanga wenka naabaasa kuhindura ekintu kyona ekirikwera, nituba nitubaasa n'okumwesiga ngu naabaasa kutuhindura abarikwera, obwo turikumworobera.
Nk'oku Ruhanga yaagambire, "Buzimazima mutaribura kurinda sabato zangye; ahabw'okuba niko kamanyiso ahagati yangye naimwe omu busingye bwanyu bwona, mubone kumanya ku niinye MUKAMA orikubeeza." (Okuruga 31:13).
Enyetegyereza y'okuramya ehindukire, yaahika aha kumanyisa okweshongora bweshongora, nk'omuringo gw'okuruhuura omuntu omu biteekateeko.
Ruhanga naayenda ngu tuhamye okuramya okw'omu Baiburi, okw'okwijuka ekiro kya Sabato, turikukiramizaho Mukama wakyo (Matayo 12:8) kandi oshemereire kuba ari Mukama waitu. Okwo nikwo kuramya okurikutunguurwa aha shaaha ye y'okucwa orubanja.
Sabato y'ekiro kya mushanju n'enshonga ei baingi batarikwikirizana nayo, kwonka tushemereire kucwamu kworobera ebiragiro bya Ruhanga okukira okworobera eby'abantu (Ebyakozirwe 5:29).
Obutegyeki, ebitongore, n'abantu buntu barugire ahari Ruhanga n'ebiragiro bye. Omu mahanga maingi, n'ekya buriijo kugyemesereza abeegi kushoma ahari Sabato nari ab'eby'obutegyeki kukora enteerane ezirikwetengyesa abantu kubaho ah'eizooba rya Sabato.
Nangwa n'amadiini nigahuumuriza abarikuribatiirira ebiragiro bya Ruhanga, zirikubooreka nk'abataine rubanja. Kwonka Ruhanga we taribabara nk'abataine rubanja.
Abakundwa, tushabe, ahabw'embabazi za Ruhanga ngu ebigyendererwa bya Baiburi byeyorekyere omuriitwe, obwo twaba tutegyereize MUKAMA waitu Yesu Kristo.
Hakaba hariho obunaku obu waabaire otarikufayo ahabw'okuba omushana gukaba gutakakujwereire, ahakuba MUKAMA akaba ariyo naakitubumbabumba nk'abantu, hamwe n'ekanisa nk'ekanisa. Kwonka hati turi omu biro by'emperu.
Okusingura ekibi tikirikubaasika kuhikwaho twaba nitukigaya ebiragiro bya Ruhanga, tukaguma omu bugomi.
Nk'oku Ruhanga yaahangire buri kintu kandi akareeba oburungi bwabyo bwanyima ya saabiti y'obuhangi, okuhikiirira kushemereire kutweyorekyeramu buri izoba tukahika aha bukuru obw'orugyero rwa Kristo oruhikire (Abaefeso 4:13).
Shoma obutumwa obu omu Rujungu
Reba ekyetengo kyaitu kyo kuhitsya obu obutumwa aha bantu baingi
Comments
Post a Comment