[This article is under review]
Kandi monalangira ogundi mulaika akaguluka endata omo kyanya, iniawiwte Engulu Yowene y’erikota erikangiriryayo oko bandu abikere omo kihugo, oko buli kitunga ky’abandu, n’obuli kihanda, n’obuli mubuge, n’oko bandu. Neryo mwabuga n’omulenge munene ati;
Mubahe Nyamuhanga, kandi mumupipe! Kusangwa endambi y’eritswera liwe yamahika. Kandi muramaye Nyamuhanga oyowahangika, olubula n’ekihugo, n’engetsi, n’esisoko sy’amagetsi (Eribisulirwa 14:6,7).
Engulu Mbuya y’erikota n’Engulu y’obwami, eyalagawa omo Matayo 24:14 sikatulaganibawa uku bandu abosi, oko mugulu w’enduli y’eby’ekihugo kino. Ni muyisa munene kusangwa itwe nitwe tukowa omwatsi oyu oko mugulu ono. Twanganabya ituli baguma boko bandu ab’omugulu w’enduli abo Yesu akaleta om’obwami bwiwe, omubiri wiwe ow’erilamya abandu ate ahwayo/alumwa.
Mubahe Nyamuhanga kandi mumuhe olukengerwa:
Eryubaha Omwami Mukulu lyo nzuko y’amenge. Nyamuhanga akayisunza itwabya n’obulengekania obw’erihutata twamasonda eritendimwowa. Itwaganirya erimusikya haguma n’ebihano (ebirayiro), biwe, kisangwa eyo yonzuko eyikatulolaya okw’iminyerera esyonzira esy’obwami bwiwe. Omundu amabulako erisikya ebihano bya Nyamuhanga ebi, neryo syangayitegererya omubiirii wa Yesu omo buswire.
Tutolere itwahika aho tukalangirira ebihano bya Nyamuhanga omo butunganenebwabyo, itukaminyerera emibere yetu ey’obubihya kandi n’eritswera eryo bihano ebi bikahira uku bakola nabi ngatwe. Eriminya ekyo kikabya nzira eyihikene omw’iminyerera erisabulwa lyetu n’eriyihayo oko butunganene bwiwe. Erisaga Nyamuhanga, nikwa, ly’erikenga ebihano biwe, n’eriminyerera obutunganene bwiwe.
Sihabye butabale kutse aho tukakolera hosi, ahangatutabalako erilaba obunyamutima obukasikaya Nyamuhanga. Tukatolera itwasikya ebihano biwe mo bibuyirire kandi ebihikene, kandi itwasaba Omukama Yesu erituha erikinda ekibi, itunasi ndeke ekibi kukiri initwa ebihano (1 Yoane 3:4). Eyi yo nzira eyo tukubahiramo Nyamuhanga omo kwenene.
Paulo mwasobolya omwatsi ati, eribyaho omo butunganene, likahamba n’oko irya, n’erinywa n’eyindi mibiri tukakola eyosi. “Neryo wamalya akalyo, kutse ukapulya, kutse wamakola ekinduki, ukole ebyosi busana n’eriha olukengerwa uku Nyamuhanga.” (1 Korinto 10:31). Engulu ey’erikota yikatulaliraya uku lulengo olukatutanga eritsandya emibiri yetu erilaba omo byo tukalya, n’erinywa, kutse erilaba omo mikania eyitundatundire n’erihira ebindu ebitsandire embere sya meso wetu (Esy.101:3). Tukahabulawa eriyiteya uku mwatsi wosi awatehereraya Nyamuhanga y’olukengerwa omo ngebe syetu esyabuli kiro. Tutolere itwatsira ebyosi ebikatsurumaya emibiri yetu, n’obwabu, n’ebibatsi, n’engulube n’ebikalwa omo mitsiro eyi. Eribirikirwa ery’endata likayitsutsa itwakolesya ebyalya eby’ebirimwa. Nakwilaba aho, emibiri yetu ey’ebiro ndatu (mukaga) (6), yitolere erisondolwa n’ekihano ekikasikaya Nyamuhanga.
Amasako – biblia, yikakanaya okwabo abakaliga omwatsi oyu yitya; “Hano ho hali abakategaya ebihano bya Nyamuhanga, n’erikirirya lya Yesu” (Erib. 14:12).
Ebihano lolulengo olo Nyamuhanga akakolesaya akatswera emitse yetu. Utunge erikirirya imuwateya ebihano bya Nyamuhanga “Utawite erikirirya kikalire eritsemesya Nyamuhanga” (Abaebrania 11:6). Erikirirya erihikene likenditusondola eribya omo ngebe ey’obutunganene, kandi likenditusondola eryolobera erikangirirya ery’abaminyereri /abanabi, nerikenga obuli nungu ey’ekinywa kya Nyamuhanga n’omokyangabya ngakyamayisosa oko byo twasi. Erikirirya ery’okwenene lyeryo. Eki kihendukire uku mwatsi wetu eriyisegemerya eyetu mibere eyikatuteba ngatwanginalamibwa n’omo twangatikatika uku Nyamuhanga n’esyonzira siwe n’erikunga erikakanganibawa omo kinywa kiwe. “ Nikwa erikirirya ni minya kundu, emyatsi eyotukahira kwamaha, kandi ni’iriga kwenene emyatsi eyotutelangira” (Abaeb. 11:1).
Erilaba omo mulaika w’erimbere, abandu bakabirikirawa eryubaha Nyamuhanga n’erimuha olukengerwa kandi n’erimuramya mo muhangiki w’olubula n’ekihugo. Eritoka omwatsi oyu, batolere eryolobera ebihano biwe. Omunyamenge akahabula ati; “Enduli y’omwatsi oyu yeyi; ebyosi byabiryowibwa. Gubahe Nyamuhanga, utegaye ebihano biwe, kusangwa ebi byo bitolere ndeke, busana n’obuli mundu.” (Mugambuli 12:13). Sitwangatsemesya Nyamuhanga omo iramya lyetu, twamataluka ukw’olobera ebihano biwe.
Kwenene “Kusangwa erianza Nyamuhanga ni’ ikwama ebihano biwe, kandi ebihano biwe sibikalire.” (1 Yoane 5:3). Ebihano bya Nyamuhanga bikabisula olwanzo lwiwe kandi ibwa Nyamuhanga ni lwanzo. Tukabya tukakandayirira erikwama ebihano bya Nyamuhanga, ekyo kikabisula kutwanzire emibere ya Nyamuhanga.
Sitwangabya buguma na Nyamuhanga tutetatsuka eriminyerera obubihya bwetu kubukaminyikala emuliro w’ebihano ebibuyirire biwe. Sitwangasabulwa, omo kibi twamabya batatsomana obutunganene bw’emibere ya Nyamuhanga eyikaminyikala erilaba omo kihano kiwe. Sitwangabana Yesu, tutetakwa enyota ey’eribindulw erisosa emibere yiwe eyibuyirire. Neryo sitwangabindulwa twamabula erikirirya ko Yesu akatoka erituhira omo mibere yiwe n’eribasula omw’ikirirya n’obwowa.
Endambi y’eritswera lya Nyamuhanga
Eritulago liti; “Endambi y’eritswera liwe yahikire” (Eribisulirwa 14:7), kikaminyisaya, erilola hakuhi n’erihwaho ly’omubiri wa Kristo busana n’erilama ly’abandu. N’ibirikira n’omulenge munene eryaluba. Eribya ini mulenge w’aluba likalwa omo mwatsi owa obuminyereri / bunabi bwe biro 2300, aho buli kiro kikimanira omwaka muguma (1), obunabi buno bwahulawa omo Danieli 8:14. Kandi obunabi obo mubwahindana omo mwaka 1844. Eribirya ehekalo erikakanibawako omo Dnieli 8:14, likakanganaya endambi ey’eritswerwa, eyisosire ekiro eky’eribuyirwa ekyateyibawa n’aba Israeli (Abalawi 23:27-32). Kikakanaya uku mubiri wa Kristo, erilusya ekibi omo mitima ey’abandu n’erituleta eritusuulya uku ilugirirana omo mwoyo n’omo kilubirirwa kya Nyamuhanga. Neryo obutuku obutsukire 1844, nibwamutambo omo angirira obutunganene bwa Nyamuhanga obukahabawayo uku bandu.
Abandu bangyi banasi erisubula lya Kristo kuliri lya luba, aliwe ni ngendo singahi esyo twamataganirya uku itswera eririho enduli yite yahiika? Yesu akendibugirira eritutswera ate asubula, nikwa erisubula liwe likendibya iniabiritwamo olwa buli mundu olwa keranakera. Yikendibya ndambi ey’erihererya abandu b’obuhingyi bwabo (Mat.20:1-6; Erib. 22:12).
Engulu ey’erikota, yitolere eriyitegereribwa omo buswire kusangwa ono ni mugulu w’enduli. Ebitabo eby’emibiri yetu binasukwirwe embere sy’omutsweri, esyongebe sy’abandu bosi sinemukekeywa embere sya Nyamuhanga. Eritsuka n’abandu ababya b’erimbere oko kihugo ,erihika uku b’omugulu ono, Yesu omutonganiri wetu anemutwala emyatsi y’ebyesyongebe syetu omo buli bwitsikulu embere sy’eribuyiro, erihika aho abaliho abosi eritswera lyabo likendihwa. Obuli rina likahulawa kandi obuli lubanza ilwasamalirwa ndeke. Abo basa abakaliga eryambala esyongimba esyo butunganene bwa Nyamuhanga bo basyasikibwa amena wabo omo kitabo eky’engebe (Erib. 3:5).
Eno nindambi eyabuli mundu erikuutya omutima wiwe. Buli mundu niwalukwamirwa eriganirya, eriteya, n’erisaba. Nyamuhanga syatatuhamula eryingira omo mutima ow’amulikyetu. Eritolererya lyetu likwame kutsibu eriminya emikolere ya Satani akagusa omo mitima yetu, n’erilangira amalema awali omo mibere yetu kandi ngani mubiri wahi owakayitsutsa erikolwa omo miyi yetu. Nakandi itwataswayitsutsa eryangirira olukogo lwa Nyamuhanga, oluli butoki bwiwe obukabisula emibere ya Kristo omwitwe (Abanya Efeso 3:7-9).
Mumupipe oyuwahangika olubula, n’ekihugo, n’esyongetsi, n’esisoko sy’amagetse.
Omulaika w’erimbere akasisaya omwatsi ow’erisikya Nyamuhanga kwali muhangiki wetu, eribya ini nzuko y’eriminyerera endambi ey’eritswera kuyamahika.
Omwatsi owakakanibawa uku erihangikwa ly’olubula, n’ekihugo, n’engetse, n’esyongununuko sy’amagetse akakanganaya obukulu bw’e Sabato ey’e kiro eky’ebirinda. Omulaika ono akatwibukaya ekihano ekyakani aho Nyamuhanga ahangika omo biro ndatu (6),ahangikira olubula, ekihugo, engetse n’ebyosi ebirimo, kandi mwaluhuka oko kiro eky’ebirinda; neryo Omwami Mukulu mwatsumula ekiro kya sabato, n’eriyikyo mo kibuyirire”. (Eril. 20:11).
Erikania oko buhangiki n’erimatania ko ekihano eky’e Sabato, ni kikulu omo mwatsi owo mulaika ow’erimbere oko mugulu ow’eritswerwa na Nyamuhanga. Twamikirirya omo buhangiki bwa Nyamuhanga tukabya itwamamayiketera obutoki buwe obw’erituhangika mo bandu abatawite kibi ngayo kwatawite kibi. Itunasi Nyamuhanga ngoko akatoka erikola omundu mo mutunganene, neryo tukendimuyiketeraomolukwamirwa olw’erituyiramo babuyirire twamamwolobwera. Ngoko Nyamuhanga abuga ati; “Kandi ubwire abana ba Israeli uti, Kwenene mwasyateya esyo Sabato syage; kusangwa ni kiminyikalo omo katikati kage, nenyu, omosyondengo syenyu syosi, imwatoka eriminya ko ndi Mwami Mukulu oyukabahigula.” (Eril. 31:13).
Eriyitegererya eriramya, lyabirihuma erisuba uku mukoro buyira, owerihalamba, erikawatikaya erihumulikana omo bulengekania. Nyamuhanga anzire itwahatikana eriramya erihikire erisegema uku mwatsi w’e Biblia erikabisula ery’ibuka e Sabato n’okweryo y’ona mukama w’e Sabato (Matayo 12:8). Neryo ahikire eribya Mukama wetu nibya. Eriramya eritolere erisumbwa omo ndambi eno ey’olubanza.
Omwatsi owe Sabato ey’ekiro eky’ebirinda, abere owamalwa amanene, aliwe tutolere erikwama erihamula lya Nyamuhanga erila erihana ly’abandu (Emibiri. 5:29). Amatabale n’abandu ng’abandu babiritwamo erigaya Nyamuhanga n’ebihano biwe. Omo mahanga awandi, abana bakakawa eriyasoma oko kiro ky’e Sabato, kutse esyo gavumente sikanakaka esyondulani syasyo, erikola oko Sabato. N’ebisomo nibya bikakalaliraya eritwa ebihano bya Nyamuhanga. Ibo ibowa isibawite lubanza, aliryo Nyamuhanga syalibaganza ngabatawite lubanza!
Abanze, tukasaba tuti igunemuwatikibwa olukogo lwa Nyamuhanga, omuliwe mubutuke, obuganirya obukaliga buti eriminya obu Kristo nikikulu tukalindirira Kristo Omukama. Hanabere obutatsomana omo ngebe yawe, kundi ekyakakala kyabya isikiri kyaka omo ngebe yawe, kandi n’Omwami Mukulu inyanemusonda eriyibanira omwanya omwiwe n’ekanisa nibya. Aliwe lino tuli omo biro by’enduli. Nyamuhanga ngokwahangika buli kindu, eritungananibwa litolere iryabanika erilaba omo Kristo. Erikinda ekibi siryangatokekana twamatenditsomana ebihano bya Nyamuhanga, twamikala itunahatikene eribya n’obuhaka tukalwa na Nyamuhanga.
Read this article in:
Comments
Post a Comment